व्यक्त-अव्यक्ताच्या मध्यसीमेवर: स्वप्नसमाधी

Thursday 17 December 2015

स्वप्नसमाधी

झाडांच्या बुंध्यात... फांद्यात..

टांगलेले असतात झोके

जागोजाग...

पुरेशा अवकाशाची

वाट पाहत असतात

गाढ मौनात !

अचानक घालू नका घाव

बुंध्यांवर.. फांद्यांवर

आतल्या झोक्यांवर

झुलत असतील स्वप्नं

रस रंग गंधाची...

दंग असतील स्वतःत

अनिमिष !

उद्‍ध्वस्त करू नका

ती स्वप्नसमाधी..!

***

No comments:

Post a Comment

भूमिका

कविता ‘कवी’चं नाव सोबत बाळगत असली तरी लिहून हातावेगळी झाल्यावर ती एका खोल अर्थानं कवीची राहात नाही.. फार काय ती त्यातल्या शब्दांचीही राहात नाही. कवी-मनातून बाहेर पडून शब्दांच्या रंगमंचावर कविता एकदा सादर झाली आणि पडदा पडला की पडलाच..! तिची नाळ तुटते. ती स्व-तंत्र होते. मुक्त होते कवीनं दिलेल्या आकारातून. रसिकवाचक जेव्हा त्या कवितेचा आस्वाद घेतो तेव्हा ती पुन्हा साकारते रसिक-मनात. तो तिचा नवा जन्म असतो!

कवितेचे हे जन्म.. विलय.. नवे जन्म म्हणजे उत्कट जगण्याच्या अनावर क्षणांचा एक मनस्वी खेळ..! ती या जगड्व्याळात असतेही आणि नसतेही. व्यक्त-अव्यक्ताच्या मध्यसीमेवर अवचित कधीतरी कवीला दिसते आणि शब्दात प्रकाशित झाल्यावर रसिकालाही दिसू लागते..! मला दिसलेल्या काही कविता इथे सादर करतेय रसिकमनात पुन्हा जिवंत व्हाव्यात म्हणून, प्रतिसादाच्या अपेक्षेत..!