व्यक्त-अव्यक्ताच्या मध्यसीमेवर: कृष्ण भेटूनही

Sunday 3 January 2016

कृष्ण भेटूनही

तो तिरीमिरीनं आला फुत्कारत

उभा राहिला समोर बेदरकार-

मग ठरल्याप्रमाणे

गांधारीनं

आपल्या पुण्यवान डोळ्यांवरची पट्टी

उतरवली उत्कंठेनं

तर तिच्यासमोर देह तसाच

कशाकशानं लडबडलेला

अहंकारानं झाकलेला...

कृष्ण भेटूनही

वज्रदेही होण्याची युक्ती कळूनही

तो राहिलाच कमकुवत

अमृतकुंभाच्या तळालाच भोक पडावं

तसं झालं..!

***

No comments:

Post a Comment

भूमिका

कविता ‘कवी’चं नाव सोबत बाळगत असली तरी लिहून हातावेगळी झाल्यावर ती एका खोल अर्थानं कवीची राहात नाही.. फार काय ती त्यातल्या शब्दांचीही राहात नाही. कवी-मनातून बाहेर पडून शब्दांच्या रंगमंचावर कविता एकदा सादर झाली आणि पडदा पडला की पडलाच..! तिची नाळ तुटते. ती स्व-तंत्र होते. मुक्त होते कवीनं दिलेल्या आकारातून. रसिकवाचक जेव्हा त्या कवितेचा आस्वाद घेतो तेव्हा ती पुन्हा साकारते रसिक-मनात. तो तिचा नवा जन्म असतो!

कवितेचे हे जन्म.. विलय.. नवे जन्म म्हणजे उत्कट जगण्याच्या अनावर क्षणांचा एक मनस्वी खेळ..! ती या जगड्व्याळात असतेही आणि नसतेही. व्यक्त-अव्यक्ताच्या मध्यसीमेवर अवचित कधीतरी कवीला दिसते आणि शब्दात प्रकाशित झाल्यावर रसिकालाही दिसू लागते..! मला दिसलेल्या काही कविता इथे सादर करतेय रसिकमनात पुन्हा जिवंत व्हाव्यात म्हणून, प्रतिसादाच्या अपेक्षेत..!